Ба хонаҳои баландошёна барқи иловагӣ дода шуд

Душанбе, 2 декабр. (АМИТ «Ховар», Лаззат Диловарзод),- Бино ба маълумоти идораи фурӯши барқи шаҳри Кӯлоб лимити барқ барои сокинони шаҳр тағйир дода, ҳаҷми интиқоли нерӯи барқ ба хонаҳои баландошёнаи шаҳри Кӯлоб қариб 50 фоиз зиёд карда шуд. Ин тадбир боис шуд, ки лимити барқ аз 690 ҳазор киловатт соат ба 900 ҳазор киловатт соат расонида шавад.Тибқи қарори раиси ҳукумати шаҳри Кӯлоб дар бораи тайёрӣ ба тирамоҳ ва зимистони солҳои 2011 – 2012 қарор дода шудааст, ки манзилҳои баландошёна бо барқ бештар таъмин карда шаванд.
 
Айни замон як қисми шаҳрак ва маҳаллаҳои шаҳр бо сабаби садама дар лӯлаи гази Балҷувон — Кӯлоб дар таъмини аҳолӣ бо гази табиӣ ба мушкилот дучоранд, аз ин рӯ зиёд намудани лимит амри воқеист,- афзуд манбаъ.