Боз як созишномаи ҳамкорӣ дар арафаи соли нав

Душанбе, 28 декабр. (АМИТ «Ховар», Лаззат Диловарзод).- Аз Вазорати молияи ҶТ ба мухбири АМИТ «Ховар» иттилоъ доданд, ки миёни Ҳукумати ҶТ ва давлати Швейтсария дар доираи татбиқи лоиҳаи «Беҳтар сохтани низоми обтаъминкунии шаҳрҳои минтақаи шимолии кишвар ва шаҳри Хоруғ» созишнома ба имзо расид. Ба иттилои манбаъ, санади мазкурро аз ҷониби Ҳукумати Тоҷикистон вазири молия Сафаралӣ Наҷмиддинов ва аз ҷониби ҳукумати Швейтсария роҳбари дафтари он оид ба ҳамкорӣ дар Тоҷикистон Питер Микула ба имзо расониданд. Тибқи Созишнома ҳукумати Швейтсария барои татбиқи лоиҳа 12,3 млн. доллар ҷудо намудааст. Барои татбиқи лоиҳаи мазкур Бонки таҷдид ва рушди Аврупо ба Ҷумҳурии Тоҷикистон дар ҳаҷми 10 млн. доллар қарз пешниҳод намудааст. Дар асоси лоиҳаи обтаъминкунии шаҳри Хуҷанд, ки аз соли 2004 оғоз ёфтааст, ҳамчунин шаҳрҳои Қайроққум, Конибодом, Исфара, Бобоҷон Ғафуров, Табошар, Чкалов ва маркази ВМКБ- шаҳри Хоруғ бо оби тозаи ошомиданӣ таъмин карда мешаванд. Ин лоиҳа то соли 2015 амалӣ мегардад.