Дар Қӯрғонтеппа фаъолияти дармонгоҳи амрози чашм қатъ гардид

Душанбе, 20 декабр. (АМИТ «Ховар», Мурод Сотиев ). – Дар шаҳри Қӯрғонтеппа фаъолияти ӯтоқи дармонгоҳи амрози чашми маркази вилоят қатъ карда шуд. Тавре сардори раёсати бозрасии бахши тибб Хуршед Турдиев ба хабарнигори АМИТ «Ховар» хабар дод, беморони дар муоинахона табобатшаванда хилофи талабот дар бинои беморхона қабул карда мешуданд, ки хавфи дучори сироят шудани маризони дар беморхона табобатшавандаро ба миён меорад.Бино ба маълумоти манбаъ, бинои дармонгоҳ ҳамаи шароити корро дошта ва роҳбарият метавонист, ки таҷҳизотро дар он ҷо насб карда, вазифаҳояшро дар маҳалли тайиншуда ба ҷо орад. Х.Турдиев ҳамчунин иброз дошт, ки дар ҳоли ҳозир фаъолияти ӯтоқи қабули беморон қатъ шуда ва нисбат ба роҳбарияти марказ чора дида мешавад.