Доварони ришвахӯр

Душанбе, 22 декабр. ( АМИТ «Ховар», Аловиддин Бӯриев).- Собиқ довари футбол Хуан Сзюнтсзеи чинӣ гуноҳи худро дар гирифтани ришва аз шаш клуби футболи Чин барои ташкили бозиҳои бомаслиҳат эътироф кардааст. Ҳатто ӯ баён кардааст,ки ба натиҷаи бозиҳои дӯстонаи клубҳои «Манчестер Юнайтед» ва «Шэнҷэн» дар соли 2007 ва «Сидней» бо «Шанхай Шэнхуа» дар соли 2009 –ум таъсири худро расонидааст. Аз рӯи баёноти ӯ аз соли 2005 то соли 2009 ба вай беш аз 1,6 миллион юан(252 000 доллар) ришва додаанд. Дар бораи ришвахӯриаш дар бозиҳои байналмилалӣ ба ӯ дигар довар- Чжоу Вейсин кӯмак кардааст. Ӯ ҳам ба ришвахӯрӣ ва фурӯши бозиҳо муттаҳам дониста мешавад. Алҳол дар бораи чӣ гуна ба бозиҳо таъсир расонидани ин доварон чизе гуфта нашудааст.