Хизмати беподоши табибон

Душанбе, 23 декабр.(АМИТ «Ховар», Лаззат Диловарзод).- Бино ба гуфти сардухтури беморхонаи вилоятии шаҳри Хоруғ Шодихон Гулаёзов, бо кӯмаку дастгирии Ҳукумати ҷумҳурӣ танҳо дар 5 соли охир барои таъмиру азнавсозии беморхонаи вилоятӣ аз буҷаи наздик ба 4 млн. сомонӣ маблағ ҷудо гардид. Беморхонаи вилоятӣ бо навтарин таҷҳизоти тиббии муосир муҷҷаҳаз шуда, ҳамасола дар асоси шартномаҳои тарафайн то 12 ҳазор нафар сокинони шаҳру навоҳии вилоят ва садҳо нафар сокинони аҳолии наздисарҳадии Ҷумҳурии Исломии Афғонистонро ба табобат фаро мегирад. Ба иттилои Ш. Гулаёзов, дар давоми 11 моҳи соли ҷорӣ наздик ба 12 ҳазор сокинони деҳоти ноҳияҳои атрофи вилоят дар ин беморхонаи замонавӣ табобат гирифтанд. Дар ин муддат дар беморхонаи вилоятӣ беш аз 2 ҳазору 500 амалиёти ҷарроҳӣ гузаронида шуд. Муҳим он аст, ки беморон аз ҳисоби маблағгузории буҷавӣ табобат ва ҷарроҳӣ мешаванд. Соли ҷорӣ аз буҷаи ҷумҳурӣ барои хариди доруворӣ ва таъмини беморон бо ғизо 3 млн. 412 ҳазор сомонӣ ҷудо гардид. Имрӯз хизмати беподоши табибонро бо ҳеҷ чиз қиёс кардан мумкин нест,- афзуд Ш.Гулаёзов.