«Хлопушка» то Рашт нарасид

Душанбе, 28 декабр. (АМИТ «Ховар», Лаззат Диловарзод).- То соли нав рӯзҳои башумор мондааст. Кормандони Вазорати корҳои дохилии Ҷумҳурии Тоҷикистон (ВКД ҶТ) дар доираи Қарори Ҳукумати ҷумҳурӣ аз соли 1999 «Дар бораи манъ кардани воридот ва фурӯши маводи пиротехникӣ» ва ё ба истилоҳ «хлопушка» дар сар то сари қаламрави ҷумҳурӣ рейдҳо мегузаронанд. Зимни тафтиши кормандони милиса дар бозорҳои шаҳри Душанбе 7 фурӯши ғайриқонунии маводи оташбозӣ ошкор гардида, беш аз 5 ҳазор адад маводи оташбозӣ дарёфт ва нобуд карда шуд. Илова бар ин дар чанд бозорчаю дӯконҳои минтақаи Қӯрғонтеппа аз ашхоси алоҳида низ маводи оташбозӣ дарёфт ва мусодира шуд. Рӯзи душанбеи ҳафтаи равон кормандони Бозрасии давлатии автомобилии Раёсати корҳои дохилии шаҳри Душанбе ҳангоми азназаргузаронии мошини сабукрави тамғаи «Мерседес», ки ба сокини ноҳияи Рашт Дилшод Абдуллоев тааллуқ дорад, 28 ҳазору 800 адад маводи таркандаю оташбозӣ дарёфт ва мусодира намуданд. Ба иттилои манбаъ, айни замон нисбат ба ҳамаи дастгиршудагон, ки дар вайрон намудани Қарори Ҳукумати ҷумҳурӣ «Дар бораи манъ кардани воридот ва фурӯши маводи пиротехникӣ» гунаҳкор дониста мешаванд, парвандаҳои маъмурӣ кушода шудааст.