Компютеркунонии сохторҳои шаҳрӣ

Душанбе, 30 декабр.(АМИТ «Ховар», Марзия Саидова).- Раиси шаҳри Душанбе Маҳмадсаид Убайдуллоев қарор ба имзо расонд, ки тибқи он то соли 2015 дар мақомоти иҷроияи маҳаллии ҳокимияти давлатии ноҳияҳои пойтахт шабакаи ягонаи компютерӣ роҳандозӣ мегардад. Тибқи иттилои Шавкат Саидов, котиби матбуотии Раиси шаҳри Душанбе дар буҷаи шаҳр бо ин мақсад шурӯъ аз соли 2012 қисмати алоҳида тартиб дода шуда, маблағҳои зарурӣ ҷудо мегарданд. Ҳамзамон курсҳои омӯзиши компютер барои раисон ва муовинони раисони ноҳияҳои пойтахт ва роҳбарони мақомоту идораҳои шаҳр ташкил карда шуда, ҳар як корманди сохторҳо бо компютерҳои ҳозиразамон таъмин мешаванд. Ин тадбир бо мақсади иҷрои қарори Ҳукумати Ҷумҳурии Тоҷикистон «Дар бораи тасдиқи Барномаи давлатии компютеркунонии мақомоти марказӣ ва маҳаллии ҳокимияти давлатӣ, мақомоти худидоракунии шаҳрак ва деҳот барои солҳои 2012-2015» андешида шудааст.