Лоиҳаи бо об таъмин намудани пойтахт

Душанбе, 13 декабр. (АМИТ «Ховар», Покиза Маҳмадбекова). – Бонки умумиҷаҳонӣ лоиҳаи дуюми бо об таъмин намудани шаҳри Душанберо роҳандозӣ намуд, ки беҳдошти фаъолияти корхонаи воҳиди давлатии «Обу корези Душанбе» — ро пешбинӣ менамояд. Тавре дар намояндагии Бонки умумиҷаҳонӣ дар ҶТ ба АМИТ «Ховар» хабар доданд, мақсади ин лоиҳаи арзишаш баробари 19 миллион доллар иборат аз расонидани кӯмаки техникӣ барои беҳдошти корбурди донишҳои амалию техникӣ мебошад, ки он дар навбати худ сатҳи риояи меъёрҳои хидматрасонии муштариён ва устувории молиявиро баланд мебардорад.Ба гуфти манбаъ, кӯмаки бебозгашти Ассосиатсияи байналмилалии рушд барои татбиқи лоиҳа 16 миллион доллар ва хароҷоти раёсати шаҳри Душанбе 3 миллион долларро ташкил медиҳад.Лоиҳа то соли 2015 дар амал татбиқ шуда ва бояд ба баландшавии сифати идора бо назардошти истеъмолу талабот ва беҳсозии сифати об мусоидат намояд.