Мукофот муборак!

Душанбе, 12 декабр. (АМИТ «Ховар», Людмила Дубинина). – Бо фармони Президенти Қазоқистон Нурсултон Назарбоев ба ифтихори 20 – умин солгарди Истиқлолияти ҶҚ 10 декабр дар Сафорати Қазоқистон дар ҶТ маросими супурдани медалҳои ҷашнӣ ба нависанда, тарҷумон, роҳбари дастгоҳи Вазорати фарҳанги ҶТ Абдуғаффор Абдуҷабборов ва узви Иттифоқи журналистони Тоҷикистон, раиси Ҷамъияти дӯстии «Тоҷикистон – Қазоқистон», мудири кафедраи журналистикаи Донишгоҳи славянии Русия ва Тоҷикистон, профессор Абдусаттор Нуралиев баргузор гардид. Онҳо барои саҳми арзандаашон ба рушди равобити илмию фарҳангӣ ва адабии байни ду давлати дӯст сарфарози мукофот гардидаанд. Медалҳоро Сафири Фавқулодда ва Мухтори Ҷумҳурии Қазоқистон дар Тоҷикистон Оғибой Смагулов супурд.Қобили зикр аст, ки А.Абдуҷабборов ду китоб – «Роҳи Қазоқистон» ва «Қалби АвроОсиё» — ро, ки ба рушди иҷтимоию иқтисодӣ ва илмию фарҳангии давлати ҷавони мустақил ва ободонии пойтахти нави ҷумҳурӣ — шаҳри Остона бахшида шудаанд, аз забони русӣ ба забони тоҷикӣ тарҷума кардааст.А.Нуралиев муаллифи беш аз 40 рисолаю мақола дар бораи дастовардҳои рушди равобити илмӣ ва адабию фарҳангии ду давлати соҳибихтиёр – Тоҷикистону Қазоқистон мебошад.