Омӯзгорони ҷавон ба ноҳияҳо сафарбар мешаванд

Душанбе, 5 декабр. (АМИТ «Ховар», Бекназари Абӯбакр). — Таъмин намудани мактабҳои миёнаи таҳсилоти умумӣ бо кадрҳои омўзгорӣ агар аз як тараф сатҳу сифати таълиму тарбияро ба маҷрои лозимӣ равона созад, аз ҷониби дигар он вазифаи асосии Вазорати маорифи кишвар маҳсуб мешавад. Вазорати мазкур кўшиш ба он дорад, ки пеш аз ҳама ба он ноҳияҳое, ки мушкилоти кадриро дар мактабҳо эҳсос мекунанд, таваҷҷўҳи ҷиддӣ диҳад. Балҷувон аз ҷумлаи он ноҳияҳои дурдасти кишвар аст, ки нарасидани омўзгорони забонҳои хориҷӣ ва математикаву информатика дар он ҷой дорад. Котиби матбуотии Вазорати маориф Сиддиқ Муборак иттилоъ дод, ки бо назардошти ин Вазорати маориф як гурўҳ мутахассисони ҷавони фанҳои забони хориҷиро аз ҳисоби Донишгоҳи давлатии омўзгории Тоҷикистон ба номи С.Айнӣ, Донишкадаи давлатии забонҳо ба номи С.Улуғзода ва Донишкадаи исломии Тоҷикистон ба мактабҳои ноҳияи Балҷувон барои кор сафарбар намуд. Роҳбарияти ноҳия зимни мулоқот бо мутахассисони ҷавон аз таваҷҷўҳи пайвастаи роҳбарияти давлату ҳукумат бобати рушди ин минтақа изҳори хушнудӣ карданд ва ҷиҳати пешбурди бонизоми машғулиятҳо дар таълимгоҳҳо аз лаёқати мутахассисони ҷавон изҳори боварӣ намуда, афзуданд, ки барояшон беҳтарин шароити фаъолияту зистро фароҳам меоваранд. Масъулини Вазорати маориф аз дигар мушкилоти мавҷуда ёдрас намуда, иброз доштанд, ки дар ояндаи наздик норасоии китобҳои дарсиро низ рафъ хоҳанд намуд. Омўзгорони ҷавоне, ки ба ин ноҳия фиристода шудаанд, муваззаф гардиданд, ки дар давоми фаъолият худро мутахассиси воқеӣ нишон дода, баҳри ба камол расонидани ҷавонони соҳибистеъдод нерӯи хешро дареғ надоранд.