Ошкор ва мусодираи маводи оташбозӣ

Душанбе, 12 декабр. (АМИТ «Ховар», Анварбек Сиддиқов ).- Кормандони мақомоти ҳифзи ҳуқуқи ноҳияи Ҳисор амали ғайриқонунии нигоҳ доштани маводи оташбозиро ошкор намуданд. Тавре ки аз маркази матбуоти ВКД-и ҷумҳурӣ ба АМИТ «Ховар» иттилоъ доданд, кормандони ШКД-и ноҳия 9 декабри соли ҷорӣ ҳангоми гузаронидани амалиёт истиқоматкунандаи ҷамоати деҳоти «Ҳаёти нав» Эйсанам Тошматоваро дастгир намуданд. Ҳангоми азназаргузаронии манзили истиқоматии ӯ 30600 дона маводи гуногуни оташбозӣ дарёфт ва мусодира карда шуд. Ғайр аз ин кормандони ШКД-и шаҳри Кӯлоб дар натиҷаи гузаронидани амалиёти дигар дар дохили бозори «Саховат»-и шаҳр шаҳрванд Шералӣ Зокировро дастгир намуданд ва аз ӯ 600 дона маводи гуногуни оташбозӣ дарёфт ва мусодира карданд.