Роҳҳои қисмати ғарбии Душанбе азнавсозӣ мегарданд

Душанбе, 6 декабр.(АМИТ« Ховар», Марзия Саидова).-Шаҳрдории Душанбе ҷиҳати навсозии роҳҳои кӯчаи Алишер Навоӣ (аз бурриши кӯчаи Бобоҷон Ғафуров то дарвозаи ғарбӣ) ва таҷдиди роҳи кӯчаи Неъмат Қарабоев (қисмати шарқӣ ва ғарбӣ аз кӯчаи Ҷомӣ то кӯчаи Ҷанубӣ) тендер эълон менамояд. Тендери мазкур дар асоси қарори раиси шаҳри Душанбе ҷиҳати интихоби пудратчии таҷдиду навсозии роҳҳои кӯчаҳои мазкур гузаронида мешавад. Дар тендер шахсони ҳуқуқии ватанӣ ва хориҷӣ, ки тахассуси сохтмонӣ доранд, метавонанд ширкат намоянд. Довталабон бояд ҳуҷҷатҳои заруриро то 15 декабри соли равон ба Муассисаи давлатии «Сарраёсати ободонии мақомоти иҷроияи маҳаллии ҳокимияти давлатӣ дар шаҳри Душанбе», ки фармоишгар мебошад, пешниҳод созанд.