Рушди боғдорӣ дар Мӯъминобод

Мӯъминобод, 3 декабр. (АМИТ «Ховар», С.Холов ). – Дар доираи татбиқи барномаи давлатӣ оид ба рушди соҳаи боғу токпарварӣ дар ноҳияи Мӯъминобод сол аз сол майдони боғоти нав васеъ мешавад. Танҳо дар давоми ду соли охир дар ноҳия 511 гектар боғу токзори нав бунёд карда шуд ва имсол аҳли заҳмат ният доранд, ки дар майдони 200 гектар боғи нав бунёд намуда, то соли 2014 майдони боғу токзори намунавиро ба 1000 гектар расонанд. Дар айни замон дар ноҳияи Мӯъминобод майдони умумии боғу токзор 1760 гектарро ташкил медиҳад ва имсол кишоварзони ноҳия аз майдони 1186 гектар боғи мевадиҳанда 4140 тонна мева ва аз майдони 647 гектар токзор 2075 тонна ангур истеҳсол намуданд. Мувофиқи маълумот имсол дар вилояти Хатлон дар майдони қариб 3930 гектар боғҳои нав бунёд мешавад. Бо мусоид омадани боду ҳаво дар тамоми хоҷагиҳои минтақаи Кӯлоб аҳли заҳмат санаи 2 – уми декабр ба бунёди боғу токзори нав оғоз намуданд.