Самараи хуби ҳамкориҳои ҷамъиятҳои матлубот

Душанбе, 26 декабр. (АМИТ «Ховар», Лаззат Диловарзод).- Бино ба гуфти раиси Иттифоқи ҷамъиятҳои матлуботи вилояти Суғд Яъқубҷон Эгамбердиев, соли ҷорӣ дар шаҳрҳои Хуҷанд, Қайроққум, Чкалов ва Табошар 35 маротиба намоиш ва фурӯши маҳсулоти кишоварзӣ ба роҳ монда шуда, дар онҳо беш аз 50 тонна орд, 8 тонна равғани растанӣ, беш аз 135 тонна картошка, 150 тонна пиёз, 17 тонна биринҷ, 7 тонна шакар, 48 тонна гӯшт бо нархи 20 фоиз нисбат ба бозор арзон ба мардум пешкаш гардонида шуд.Ба иттилои манбаъ, дар баробари таъмини сокинони шаҳрҳои номбурда, барои аҳолии пойтахт, аз ҷумла ба бозори «Шоҳмансур», даҳҳо тонна маводи ғизоӣ, аз қабили : картошка, пиёз, биринҷ ва сабзӣ ворид карда шудааст. Иттифоқи ҷамъиятҳои матлуботи вилоят барои сари вақт дастрас намудани маҳсулоти кишоварзӣ ба хоҷагиҳои деҳқонӣ шартнома баста, як қисми маблағро пешпардохт менамояд, ки ин усули кор ҳам барои хоҷагиҳои деҳқонӣ ва ҳам барои Иттифоқи ҷамъиятҳои матлуботи вилоят мувофиқ аст, зеро хоҷагиҳои деҳқонӣ метавонанд бо ин маблағ тухмӣ ва доруҳои минералӣ дастрас намоянд ва Иттифоқҳои ҷамъиятҳои матлубот чун харидори асосӣ маҳсулоти кишоварзиро аз ҳама пештар ба даст оранд.