Таҷлили Рӯзи энергетикҳо

Хоруғ, 26 декабр. (АМИТ «Ховар», Л.Додо). – Барқчиёни вилоят иди касбиашонро таҷлил намуданд. Ҷашни имсолаи онҳо ба 40 – солагии мавриди баҳрабардорӣ қарор гирифтани нерӯгоҳи барқи обии шаҳри Хоруғ рост омад. Ба ин хотир дар майдони назди нерӯгоҳ ҷамъомади тантанавӣ баргузор гардид, ки дар он раиси вилоят Қодири Қосим иштирок дошт. Мавсуф қайд намуд, ки бо ибтикори Президенти кишвар Эмомалӣ Раҳмон барои ҷалби сармоягузорӣ ва эъмору аз навсозии тамоми системаи барқии вилоят соли 2002 Шартномаи байни Ҳукумати Ҷумҳурии Тоҷикистон ва ширкати барқии «Помир Энерҷи» ба имзо расид, ки он барои рушди босуръати соҳа заминаи устувор гузошт.