Тарёкхона фош гардид

Душанбе, 8 декабр. (АМИТ «Ховар», Лутфия Эшонқулова). – Кормандони мақомоти ҳифзи ҳуқуқ дар ноҳияи Фирдавсии пойтахт фаъолияти як маркази нашъамандонро қатъ карданд.
Тавре ки аз Вазорати корҳои дохилии ҷумҳурӣ ба АМИТ «Ховар» хабар доданд, зимни амалиёти фаврию ҷустуҷӯӣ сокини 31-солаи шаҳри Душанбе Алексей Сахнов боздошт шуд, ки дар манзили зисташ, воқеъ дар канори шаҳри Душанбе нашъамандонро қабул кардаву ба онҳо маводи мухаддир мефурӯхтааст.
«Ҳангоми боздошт дар манзили зисти ӯ шаш нафар, аз ҷумла ду нафар занон ҳузур доштанд, ки қаблан маҳкум шуда буданд. Ҳамаи онҳо аз истеъмоли маводи мухаддир дар ҳолати сархушӣ қарор доштанд», — гуфтанд дар вазорат.
Ҳангоми кофтукови манзил чор адад сӯзандору бо боқимондаҳои маводи мухаддири навъи сахттаъсири героин дарёфт шуд.
Нисбат ба соҳибхона, ки дар манзилаш тарёкхона ташкил кардааст, парвандаи ҷиноӣ боз гардида, тафтишот идома дорад.