Вакилон ҳисоботи Раиси шаҳрро баррасӣ карданд

Душанбе, 23 декабр. (АМИТ «Ховар», Бекназари Абӯбакр). – 22 декабр дар шаҳри Хуҷанд иҷлосияи VIII, даъвати IV маҷлиси шаҳрии вакилони халқ таҳти раёсати муовини раиси шаҳр Рухсора Каримхоҷаева баргузор гардид ва вакилони халқ ҳисоботи Раиси шаҳрро доир ба рушди иҷтимоию иқтисодии шаҳри Хуҷанд дар 11 моҳи соли 2011-ум баррасӣ карданд. Нақшаи қисми даромади буҷаи умумӣ дар 11 моҳи сипаригашта 104,8 фоиз ва буҷаи маҳаллӣ 103,1 фоизро ташкил дод. Қисми зиёди даромади буҷет ба соҳаҳои иҷтимоӣ масраф шудааст.Корхонаҳои саноатӣ ба маблағи 293,1 миллион сомонӣ маҳсулот бароварданд, ки ин дар қиёс бо ҳамин давраи соли гузашта 20,1 фоиз зиёд аст.Бунёди иншооти таъиноти иҷтимоӣ ва фарҳангию маишӣ бахосса дар доираи маъракаи «400 рӯзи созандагию бунёдкорӣ – ба 20-солагии Истиқлолияти Ҷумҳурии Тоҷикистон» авҷи тоза гирифт.Аз маркази матбуоти маъмурияти шаҳри Хуҷанд ба АМИТ «Ховар» иттилоъ доданд, ки натиҷаҳои дигар соҳаҳои хоҷагии халқи шаҳр низ дилпуркунандаанд.