Вазнбардорӣ. Мусобиқа барои ҷом

Душанбе, 21 декабр. (АМИТ «Ховар», Аловиддин Бӯриев).- Дар толори варзишии Донишкадаи тарбияи ҷисмонии Тоҷикистон ба номи Саидмӯъмин Раҳимов мусобиқаи вазнбардорон барои дарёфти Ҷоми Федератсияи вазнбардории ҷумҳурӣ ба анҷом расид. Дар он аз рӯи ҳашт вазн варзишгарон аз шаҳрҳои Душанбе, Қӯрғонтеппа, Кӯлоб, Ваҳдат, ноҳияи Темурмалик ва Донишкадаи варзиш ширкат карданд. Дар ҷамъбаст миёни дастаҳо вазнбардорони Қӯрғонтеппа барандаи ҷои аввал ва соҳиби ҷом гардиданд. Зинаи дуюмро душанбегиҳо ва мақоми сеюмро варзишгарони ноҳияи Темурмалик сазовор гаштанд. Дар зӯрозмоиҳо аз рӯи вазн варзишгарон Хуршед Тӯраев (69 кг), Азиз Шукуров (94 кг) ва Баҳриддин Нуриддинов (105 кг) аз шаҳри Қӯрғонтеппа, Қурбоналӣ Давлатов (62 кг) ва Фаттоҳ Зиёев (+105 кг) аз шаҳри Душанбе, ҳамчунин, Парвиз Бегов (Ваҳдат, 56 кг), Диловар Мирасов (Темурмалик, 77 кг) ва Рустами Мурод (Кӯлоб, 85 кг) ғолиб омаданд.