ВИЧ/СПИД-ро пешгирӣ мебояд

Кӯлоб, 3 декабр. (АМИТ «Ховар», С.Холов). – Дар Тоҷикистон барои пешгирии паҳншавии вируси норасоии масъунияти инсон ва огоҳии мардум аз ин беморӣ корҳои назаррас ба анҷом расонида шуда, барномаи давлатӣ қабул гардидааст, ки Вазорати тандурустӣ, марказҳои мубориза бар зидди бемории вируси норасоии масъунияти одам ва ташкилотҳои ҷамъиятӣ аз рӯи он амал мекунанд. Ташкилоти ҷамъиятии «Анис»-и шаҳри Кӯлоб дар давоми фаъолияти хеш ба аксар гирифторони бемории мазкур кӯмак расонидааст.Ташкилоти ҷамъиятии «Анис» дар театри ба номи Сайдалӣ Вализода ҳамоиш ташкил намуд, ки дар он хонандагони мактабҳо ва донишҷӯён иштирок карданд. Дар он кормандони ташкилот ва дигар мутахассисон оид ба беморӣ маълумот дода, бо намоиши саҳнаҳо дар бораи роҳҳои пешгирии паҳншавии бемории мазкур маълумот пешниҳод карданд.