Ёде аз Фурӯғи Фаррухзод

Душанбе, 20 декабр. (АМИТ «Ховар», Афшини Муқим).-Имрӯз дар Донишгоҳи миллии Тоҷикистон бо иштироки устодону донишҷӯёни донишгоҳ ва аҳли ҳунар ёдбуди шоираи маъруфи Эрон Фурӯғи Фаррухзод баргузор гардид. Фурӯғи Фаррухзод аз бузургтарин шоиронест, ки байни тамоми форсизабонон шӯҳрат дорад ва дар Тоҷикистон низ аксари шоирон дар пайравии Фурӯғ шеърҳо гуфтаанд. Маҳфилро суханрониҳои пурмазмуни устодони сухан ва қироати шеърҳо аз эҷодиёти ин шоираи хушсухан шукӯҳи тоза бахшиданд.