Ғолибони озмуни дуюми байналмилалӣ дар Минск

Душанбе, 25 январ. (АМИТ «Ховар», Лаззат Диловарзод).- Бо мақсади ташкили дурусти таълиму тадриси ҳайати шахсӣ дар бахши ҳирфавият дар КВД «Тоҷикаэронавигатсия» ду синфхонаи бо тамоми таҷҳизоти замонавӣ муҷҷаҳаз ба истифода дода шуд. Дар филиали дар Хуҷандбудаи ин корхона синфхонаи нави машқҳои тренажёрӣ бо насби таҷҳизоти наву замонавӣ мавриди баҳрабардорӣ қарор гирифт.- Мақсад аз гузаронидани таҷрибаомӯзӣ ва таълиму тадриси ҳайати кадрии ин идораи ҳавопаймоӣ ҳамоно баланд бардоштани сатҳи донишҳои касбӣ ва малакаю маҳорати ҳирфавии кормандон барои таъмини бехатарии парвозҳои ҳавопаймоҳо мебошад,- гуфт директори кулли КВД «Тоҷикаэронавигатсия» Анвар Мақсудов ба мухбири АМИТ «Ховар».Маҳз натиҷаи ҳамин корҳо буд, ки се намояндаи КВД «Тоҷикаэронавигатсия» дар озмуни дуюми байналмилалии мутахассисони идораи ҳаракати ҳавоӣ-«Корбарии амалӣ дар тренажёри диспечерӣ» дар шаҳри Минск соҳиби ҷои аввал гардиданд,- афзуд А. Мақсудов.