Ҳамкории тиҷоратию иқтисодии Тоҷикистону Афғонистон идома дорад

Душанбе, 9 январ. (АМИТ «Ховар», Кристина Эрлих). – Дар ҷаласаи навбатии комиссияи байниҳукуматии Тоҷикистону Афғонистон оид ба ҳамкории тиҷоратию иқтисодӣ, ки 7 январ дар шаҳри Кобул ба кораш шурӯъ намуд, масъалаҳои ҳамкории дуҷониба дар соҳаҳои энергетика, нақлиёт, кишоварзӣ, сохтмон, бахшҳои илмию техникӣ ва иҷтимоӣ мавриди баррасӣ қарор гирифтанд. Дар ин бора аз Вазорати энергетика ва саноати ҶТ ба хабарнигори АМИТ «Ховар» хабар доданд.Ҳайати Тоҷикистонро дар комиссияи байниҳукуматии Тоҷикистону Афғонистон вазири нақлиёти ҶТ Низом Ҳакимов ва ҳайати Афғонистонро вазири иқтисодиёти Ҷумҳурии Исломии Афғонистон Абдулҳодӣ Арғандвол роҳбарӣ менамоянд.«Масъалаи содироти нерӯи барқи Тоҷикистон дар фаслҳои баҳору тобистон ба Афғонистон ва татбиқи лоиҳаи CASA – 1000 яке аз масъалаҳои асосии гуфтушуниди Тоҷикистону Афғонистон гардид. Ҷонибҳо ҳамчунин масоили тезонидани сохтмони роҳи оҳанро аз Эрон то вилояти Ҳироти Афғонистон, ки то соҳили дарёи Панҷи Тоҷикистон тӯл кашида ва ба шохаи роҳи оҳани Тоҷикистон пайваст мешавад, мавриди баррасӣ қарор доданд», — зикр намуданд дар Вазорати энергетика ва саноати мамлакат.Мувофиқи маъмулоти Агентии омори ҶТ, муомилоти моли байни Тоҷикистону Афғонистон аз рӯи натиҷаи 11 моҳи соли 2011 беш аз 123 миллион доллари ИМА – ро ташкил дод, ки назар ба нишондоди ҳамин давраи соли 2010 баробари 53,8 фоиз зиёд аст.Хотирнишон месозем, ки ҷаласаи чоруми комиссияи байниҳукуматии Тоҷикистону Афғонистон имрӯз, 9 январ, корашро анҷом дода ва аз рӯи натиҷаи он ҳуҷҷатҳои дахлдор имзо мешаванд.