Ҷамъбасти олимпиадаи фаннӣ

Хоруғ, 23 январ. (АМИТ «Ховар», Л.Додо ). – Дар шаҳри Хоруғ Олимпиадаи вилоятии фаннӣ миёни толибилмони шаҳру ноҳияҳо ҷамъбаст гардид. Тибқи низомномаи Вазорати маорифи ҷумҳурӣ озмуни вилоятии фаннӣ дар ду давр рӯи кор оварда шуд. Ба даври аввали он 124 нафар хонандагони фаъоли синфҳои болоии шаҳру ноҳияҳо донишу маҳорати худро аз фанни риёзӣ намоиш доданд. Озмун собит намуд, ки аксари иштирокдорони олимпиада аз ин фан дониши хуб дошта, ҳангоми ҳалли мисолу масъалаҳо ба хатогиҳо роҳ надоданд.Сардори раёсати маорифи вилоят Ғарибшоҳ Ғарибшоев аз ҷараёни баргузоршавӣ ва натиҷаи ҷамбаъсти озмуни вилоятии хонандагон сухан ронда, гуфт, ки ин дафъа ба ҳайати ҳакамон омӯзгорони ҳамаи ноҳияҳо шомил буданд. 42 нафар хонандагони беҳтарин ба озмуни ҷумҳуриявӣ роҳхат пайдо карданд.