Ҷавонони пойтахт ба «Созандагони Ватан» пайвастанд

Душанбе, 16 январ. (АМИТ «Ховар», Дилшодаи Хайруллоҳ).- 13 январи соли ҷорӣ дар шаҳри Душанбе Намояндагии Ташкилоти ҷамъиятии ҷавонон «Созандагони Ватан» таъсис дода шуд. Дар нахустин маҷлиси умумии намояндагии «Созандагони Ватан» зиёда аз дусад нафар ҷавон ширкат варзида, аз таъсиси намояндагии ташкилоти номбурда ҷонибдорӣ карданд. Дар ҷаласа дар ҳайати 27 нафар аъзои Маҷлиси умумӣ ва роҳбари намояндагӣ интихоб карда шуд. Сипас барои иштирокдорон аз ҷониби ҳунармандону ҳофизони Консерваторияи миллӣ ва донишҷӯёни Донишкадаи санъати Тоҷикистон ба номи М.Турсунзода чорабинии фарҳангӣ доир гардид.Хотиррасон бояд кард, ки Ташкилоти ҷамъиятии ҷавонон «Созандагони Ватан» иттиҳоди навтаъсис мебошад, ки барои муттаҳид намудани ҷавонон, тарбия намудани онҳо дар рӯҳияи ватандӯстиву хештаншиносӣ ва бо ин восита омода намудани кадрҳои баландихтисосу ташкилотчӣ, ташаббускору роҳбарони ҷавон созмон дода шудааст.