Аввалин истироҳати зимистонаи наврасон

Хуҷанд, 26 январ. (АМИТ «Ховар», Мирзалӣ Амонов).-Бори аввал дар ҷумҳурӣ кӯдакону наврасон дар истироҳатгоҳи «20 солагии истиқлолият», воқеъ дар деҳаи хушманзараи Деҳмойи ноҳияи Ҷ.Расулов ба фароғату истироҳати зимистона фаро гирифта шуданд. Истироҳат дар вақти таътили зимистона дар ду баст ташкил карда шуд. Басти 1-ум аз 2-юми январ то 14-уми январ бо фарогирии 159 нафар ва басти дуюм аз 14-уми январ то 25-уми январ бо фарогирии 170 нафар мактаббача гузаронида шуд. Дар истироҳатгоҳ ҳамаи шароити фароғатӣ муҳайёст ва наврасону кӯдакон ғайр аз истироҳат дар маҳфилҳои кешбофӣ, расмкашӣ, кашидадӯзӣ, омӯзиши компютер, рӯзгордорӣ иштирок намуда, маҳорату дониши худро сайқал доданд. Сар аз рӯзи ифтитоҳи истироҳатгоҳ зиёда аз 900 нафар мактаббача аз ҳар гӯшаю канори кишвар дар он таътили худро гузарониданд.