Ба маблағи беш аз 29 млн.сомонӣ хизматрасонии коммуналӣ

Душанбе, 11 январ. (АМИТ «Ховар», Лаззат Диловарзод).- Дар соли 2011 аз тарафи хоҷагии манзилию коммуналӣ (ХМК)-и ҷумҳурӣ ба истеъмолкунандагон ба маблағи 71 млн.993,7 ҳазор сомонӣ хизмати коммуналӣ расонида шуд. Фоидаи аз хизмати коммуналӣ ба даст овардаи корхонаҳои соҳа дар соли 2011 беш аз 5 млн. 400 ҳазор сомониро ташкил дод,- иброз дошт директори кулли Корхонаи давлатии фаръии Хоҷагии манзилию коммуналии ҷумҳурӣ Алимурод Тағоймуродов дар нишасти матбуотие, ки 11 – уми январи соли 2012 дар толори хурди корхонаи мазкур бо иштироки хабарнигорони ватанӣ доир шуд. Директори кулли ХМК Алимурод Тағоймуродов ёдовар шуд, ки қисме аз ин корхонаҳо, аз ҷумла корхонаҳои давлатии фаръии ХМК, ниҳолпарварӣ ва кабудизоркунии шаҳри Кӯлоб, корхонаҳои давлатии фаръии ХМК –и ноҳияҳои Панҷ, Абдураҳмони Ҷомӣ, Ҳамадонӣ, Темурмалик ва Ховалинги вилояти Хатлон, шаҳрҳои Табошар, Исфара, Панҷакент, Қайроққум, ноҳияҳои Айнӣ, Зафаробод, Ғончии вилояти Суғд, ноҳияҳои Ҷиргатол, Ҳисор, Рӯдакии тобеи марказ, Мурғоб, Дарвоз ва Рӯшони ВМКБ соли 2011- ро хуб ҷамъбаст намуданд. — Дар соли 2011 корхонаҳои коммуналӣ корҳои ободонӣ ва кабудизоркуниро ба маблағи 18 млн. 275 ҳазор сомонӣ, таъмири фонди асосии манзилро ба маблағи 889 ҳазор сомонӣ иҷро намуданд,- иброз намуд А.Тағоймуродов дар рафти кори конфронс ба хабарнигорон.