Барномаи мусоидат ба шуғли аҳолӣ дар соли 2011 пурра иҷро гардид

Душанбе, 9 январ. (АМИТ «Ховар», Дилшодаи Хайруллоҳ). –Соли 2011 дар фаъолияти мақомоти давлатии шуғли аҳолӣ бобати танзими бозори меҳнат ва таъмини кор як қатор корҳои муҳим анҷом дода шуданд.
 
Дар давраи ҳисоботӣ мақомоти давлатии шуғли аҳолӣ ҷиҳати танзими масъалаҳои бозори меҳнат ва шуғли аҳолӣ, таҳким ва татбиқи босамари сиёсати давлат пайваста амал намуда, дар доираи Барномаи мусоидат ба шуғли аҳолии Ҷумҳурии Тоҷикистон барои соли 2011 аз рӯи 6 самти асосӣ: таъсиси ҷойҳои нави корӣ; миёнаравӣ дар бозори меҳнат; тайёрии касбӣ, бозомӯзӣ ва такмили ихтисоси бекорон; дастгирии фаъолияти соҳибкории бекорон; ташкили корҳои ҷамъиятии музднок ва таъину пардохти кӯмакпулӣ барои бекорон иҷрои барномаро ба андозаи 120 фоиз таъмин намуд. Дар ин муддат ба мақомоти давлатии шуғли аҳолӣ 105302 нафар шаҳрванд муроҷиат намуданд, ки 64079 нафари онҳо ҳамчун бекор ба қайд гирифта шуда, ба 44315 нафар расман мақоми бекорӣ дода шуд. Тавассути татбиқи чорабиниҳои Барномаи мусоидат ба шуғли аҳолӣ дар маҷмӯъ 32406 нафар шаҳрванд бо ҷойҳои корӣ таъмин хоҳад шуд, ки 112,1 фоизи нақшаи барномаро ташкил медиҳад.