Барномаи нави ислоҳоти судӣ

Душанбе, 17 январ. (АМИТ «Ховар», Лаззат Диловарзод).- Бо мақсади таҳкими минбаъдаи ҳокимияти судӣ, баланд бардоштани нақши суд дар ҳифзи ҳамаҷонибаи ҳуқуқу озодиҳои инсон, ҳимояи манфиатҳои қонунии давлат ва корхонаю муассисаҳо бо фармони Президенти кишвар «Барномаи нави ислоҳоти судӣ — ҳуқуқӣ барои солҳои 2011- 2013» тасдиқ гардид, ки он як сол боз фаъолият дорад.Бино ба гуфти раиси Шӯрои адлия Зафар Азизов, барои такмил додани фаъолияти судҳо вобаста ба махсусгардонии баррасии парвандаҳои маъмурӣ ва оилавӣ, ки аз талаботи банди 8 –и барномаи мазкур бармеояд, дар ҳайати судҳои вилоятӣ ва шаҳри Душанбе коллегияҳои судӣ оид ба парвандаҳои маъмурӣ ва оилавӣ таъсис ёфт. Бо назардошти шумораи парвандаҳои зикргардида дар судҳои шаҳрҳои Хуҷанд, Конибодом, Панҷакент, Кӯлоб, Қӯрғонтеппа, Турсунзода, Ваҳдат, ноҳияҳои Бохтар, Ёвон, Сино, Исмоили Сомонӣ, Фирдавсӣ, Шоҳмансур ва дигар судҳои бисёрҳайата баррасии ин парвандаҳо ба зиммаи судҳои алоҳида вогузор шудааст.