Баррасии масоили муҳоҷирон дар Душанбе

Душанбе, 4 январ. (АМИТ «Ховар», Фарҳоди Шомаҳмад).- 4-уми январи соли 2012 сардори Хадамоти муҳоҷирати назди Ҳукумати Ҷумҳурии Тоҷикистон Сафиаллоҳ Девонаев бо муовини сардори Хадамоти федералии шаҳри Санкт-Петербурги Федератсияи Русия Дмитрий Никифоров дар шаҳри Душанбе мулоқоти судманд анҷом дод. Ҳадафи асосии мулоқот муҳокимаи масъалаҳои раванди муҳоҷирати меҳнатӣ, ҳамчунин ба танзим даровардани вазъи иқомати муҳоҷирон дар шаҳри Санкт- Петербург мебошад. Дар ин бора ба хабарнигори АМИТ «Ховар» Абдулло Қодирӣ, сухангӯи Хадамоти муҳоҷирати назди Ҳукумати Ҷумҳурии Тоҷикистон иттилоъ дод. Ба гуфти А. Қодирӣ, зимни мулоқот масъалаҳои ҳуқуқӣ ва ҳифзи иҷтимоии муҳоҷирони меҳнатии Тоҷикистон ва оилаҳои онҳо мавриди муҳокима қарор гирифтанд.