Бехатарии парвози тайёраҳо нигоҳ дошта шуд

Душанбе, 23 январ. (АМИТ «Ховар», Лаззат Диловарзод).- Бино ба иттилои директори кулли «Тоҷикаэронавигатсия» Анвар Махсудов, дар давоми соли 2011 тавассути кордонӣ ва фаҳмиши баланди мутахассисони хадамоту сохторҳои Корхонаи воҳиди давлати (КВД)-и «Тоҷикаэронавигатсия» дар хатҳои парвози тайёраҳои Тоҷикистон ягон садама ба қайд гирифта нашудааст. «Тоҷикаэронавигатсия» ба 28 ширкати ҳавопаймоӣ, аз ҷумла ба 6 ширкати ҳавопаймоии мамолики хориҷи дур, 19 ширкати ҳавопаймоии Иттиҳоди Давлатҳои Мустақил ва 3 ширкати ватанӣ — «Тоҷик Эйр», «Сомон Эйр» ва «Ист Эйр» хизмат мерасонад. Дар соли 2011 «Тоҷикаэронавигатсия» бо мақсади баланд бардоштани сатҳи касбии мутахассисон як қатор тадбирҳо андешид, аз ҷумла таълими фаннии ҳайати шахсӣ, тайёрии касбии тренажёрӣ, хизматрасонии фаннии воситаҳои таъминоти радиотехникӣ, тамдиди мӯҳлати шаҳодатномаҳои коршоямӣ ва иҷозати ҳуқуқи истифодаи воситаҳои радионурафкан ва дигар тадбирҳои баланд бардоштани касбиятро анҷом додааст. Соли сипаришудаи 2011 «Тоҷикаэронавигатсия» бо филиали сибирии Донишгоҳи аэронавигатсияи шаҳри Красноярск дар асоси шартнома курсҳои нахустини такмили ихтисосро бо тарзи таълими фосилавӣ ба роҳ монд, ки он аз ҷониби мутахассисон ва роҳбарияти КВД –и «Тоҷикаэронавигатсия» баҳои баланд гирифт.