Ду кишвари ҳамҷавор робитаҳои парлумониро густариш медиҳанд

Душанбе, 12 январ.(АМИТ «Ховар», Марзия Саидова).-Тақвият ва дурнамои ҳамкориҳои байнипарлумонии Тоҷикистону Чин дар меҳвари мулоқоти Амиршо Миралиев, муовини аввали Раиси Маҷлиси намояндагон ва Чэн Чжилӣ, муовини Раиси Кумитаи доимии Маҷлиси Умумичиноии намояндагони халқи Ҷумҳурии Мардумии Чин қарор дошт. А. Миралиев зикр кард, ки ҳамкориҳои мутақобилан судманди гуногунсоҳа байни Тоҷикистону Чин дар асоси принсипҳои ҳусни ҳамҷаворӣ ба роҳ монда шуда, ба манфиати мардуми ҳар ду кишвар нигаронида шудааст. Мавсуф ба сатҳи ҳамкориҳои байнипарлумонии ҳар ду кишвари ҳамҷавор баҳои баланд дод ва афзуд, ки байни парлумонҳои Тоҷикистону Чин гурӯҳҳои дӯстӣ фаъолият доранд. Зикр шуд, ки байни Тоҷикистону Чин беш аз 160 санади меъёрию ҳуқуқии дуҷониба ба имзо расидаанд, ки Аҳднома миёни Ҷумҳурии Тоҷикистон ва Ҷумҳурии Мардумии Чин дар бораи ҳусни ҳамҷаворӣ, дӯстӣ ва ҳамкорӣ – асоси муносибатҳои дуҷониба мебошад. Хонум Чэн Чжилӣ ҳамкориҳои байнипарлумонии кишвараш бо Тоҷикистонро асос ва таҳкурсии равобит дар дигар самтҳо шуморид ва изҳор дошт, ки муносиботи байнипарлумонии Душанбе ва Пекин бояд нисбат ба марҳилаи феълӣ бештар рушд ёбад, зеро фароҳам овардани шароити мусоиди ҳамкорӣ байни ду кишвар ба рушди робитаҳои байни парлумонҳо иртиботи қавӣ дорад.  Бояд тазаккур дод, ки ҳайати чиноӣ таҳти роҳбарии Чэн Чжилӣ дар доираи таҷлили 20-умин солгарди истиқрори ҳамкориҳои дипломатӣ байни Тоҷикистону Чин 11 январ ба Душанбе омад. Муносибатҳои дипломатӣ миёни Тоҷикистону Чин 4 январи соли 1992 барқарор гашта, Чин сафораташро дар Душанбе 13 марти ҳамон сол ифтитоҳ кард. Сафорати Тоҷикистон дар Чин 7 апрели соли 1997 ба фаъолият шурӯъ кардааст.