Хоҷагии ҷангал чӣ истеҳсол кард?

Душанбе, 19 январ. (АМИТ «Ховар», Лаззат Диловарзод).- Аз ҳаҷми умумии маҳсулоти кишоварзӣ маблағи 4 млн. 558 ҳазор сомонии онро маҳсулоти хоҷагии ёрирасони ҷангалпарварӣ ташкил дод. Ба иттилои манбаъ, дар соли 2011 маҳсулоти растанипарварии хоҷагиҳои ёрирасони ҷангалпарварӣ нисбат ба соли 2010 ба андозаи 2, 1 баробар, чорводорӣ 15,5 фоиз зиёд шудааст. Тибқи маълумоти Муассисаи давлатии хоҷагии ҷангал ва шикори Кумитаи ҳифзи муҳити зисти назди Ҳукумати ҷумҳурӣ, корхонаҳои хоҷагии ҷангал 634 тонна ғалла, 30 тонна пахта, 1149 тонна картошка, 149 тонна сабзавот, 18 тонна маҳсулоти полезӣ, 177 тонна мева, 13 тонна ангур, 21,5 тонна гӯшт (аз рӯи вазни зинда), 12 тонна шир, 1 тонна пашм ва 2,8 тонна асал истеҳсол намуданд. Дар соли 2011 ҳамчунин дар хоҷагиҳои ёрирасони ҷангалпарварӣ 114 сар гов, 6314 сар бузу гӯсфанд, 210 сар парранда ва 440 сар асп ба ҳисоб гирифта шудааст.