Кӯчонидани аҳолӣ тибқи қарорҳои марбута

Душанбе, 10 январ.(АМИТ «Ховар», Марзия Саидова).- Дар соли сипаришудаи 2011 дар ҳудуди кишвар беш аз 1200 оила аз ноҳияҳои камзамини кӯҳистон ба водиҳо кӯчонида шуданд, ки 130 %-и нақшаи солонаро ташкил медиҳад. Аз ҷумла, дар вилояти Хатлон 144 оила, Суғд 509 ва аз ноҳияҳои тобеи марказ 604 оила ба ҷойҳои нави зист кӯчонида шуданд. Раванди кӯчонидани оилаҳо дар дохили кишвар аз ҷониби сохторҳои Вазорати меҳнат ва ҳифзи иҷтимоии аҳолии ҷумҳурӣ тибқи қарорҳои Ҳукумати Ҷумҳурии Тоҷикистон «Дар хусуси тасдиқи Низомномаи тартиби муҳоҷирати дохилӣ дар Ҷумҳурии Тоҷикистон», «Дар бораи муҳоҷирати дохилии аҳолии қобили меҳнат аз ноҳияҳои камзамин ва сераҳолии кӯҳистон ба водиҳои дорои заминҳои бекорхобидаи ҷумҳурӣ дар солҳои 2010-2012», «Дар бораи муҳоҷирати дохилии аҳолӣ аз ҳудуди ноҳияи Ҷиргатол ва ноҳияҳои минтақаи Рашт ба мавзеи Лахши ноҳияи Ҷиргатол» сурат гирифтааст.