Камбудиҳоро ислоҳ мебояд

Душанбе, 27 январ. (АМИТ «Ховар», Мавзуна Бойева).- Дирӯз дар Хадамоти истеҳсолию тиҷоратии фурудгоҳи байналмилалии Душанбе вобаста ба ташкили хизматрасонӣ ба мусофирон ҷаласа баргузор шуд. Қурбонмурод Эшназаров- сардори хадамоти мазкур иброз дошт, ки агарчи нишондиҳандаҳои меҳнатии соли гузашта хубанд, аммо барои соли ҷорӣ сатҳ ва сифати хизматрасониро баланд бардоштан зарур аст. Хадамоти истеҳсолию тиҷоратӣ аз сохторҳои калидии фурудгоҳ аст, ки бевосита бо мусофирон сару кор дорад. Таҳия, назорати доимии раванд ва танзими ҷадвали парвозҳо, қайди чиптаи ҳавопаймо, бағоҷи мусофирон, гуселу қабули мусофирон дар фурудгоҳ, бор кардан ва дастрас намудани бағоҷи мусофирон ва иттилоърасонӣ- маҷмӯи корҳоеанд, ки кормандони хадамот иҷро менамоянд. Дар ҷаласа таъкид гардид, ки ҳоло ҳам дар фурудгоҳ камбудиҳои ҷиддӣ ҷой доранд. Муомилаи дурушт, сари вақт надодани иттилоъ, дер дастрас намудани бағоҷ норасоиҳоеанд, ки бояд ислоҳ шаванд.