Касбияти нозирони минтақавӣ баррасӣ мегардад

Душанбе, 24 январ.(АМИТ «Ховар», Марзия Саидова).- Дар ояндаи наздик фаъолияти нозирони минтақавии Раёсати корҳои дохилии /РКД/ шаҳри Душанбе аз нигоҳи мутобиқат ва касбият баҳри тақвияти чораҳои пешгирии қонуншиканӣ ва таҳкими робита бо ҷомеа мавриди баррасӣ қарор дода мешавад. Доир ба ин масъала Раиси шаҳри Душанбе Маҳмадсаид Убайдуллоев ба сардори тозатаъиншудаи РКД –и шаҳри Душанбе Абдураҳмон Бузмаков дар ҷаласаи шаҳрдорӣ дастур дод. Тибқи иттилои котиби матуботии Раиси шаҳри Душанбе Шавкат Саидов дар ҷаласаи шаҳрдорӣ доир ба ҳолати ҷинояткорӣ дар пойтахт ва тадбирҳои баҳри таъмини тартиботи ҷамъиятӣ роҳандозигардида Абдураҳмон Бузмаков, сардори РКД шаҳри Душанбе гузориш дод. Раиси шаҳр бо хулоса аз гузориши сардори РКД-и пойтахт зикр кард, ки РКД-и шаҳри Душанбе риояи низоми тартиботро дар пойтахт, ки то соати 23-00 (ба истиснои муассисаҳои ҳаётан муҳим) муқаррар гаштааст, аз ҷониби тамоми субъектҳои хизматрасон новобаста аз шакл ва тобеияти идоравӣ зери назорати доимӣ қарор диҳад ва комиссияи ҷамъиятӣ масъалаи мазкурро ба таври доимӣ арзёбӣ намояд.