Китобхонаи миллӣ-армуғон ба иди Наврӯз

Душанбе, 16 январ. (АМИТ «Ховар», Афшини Муқим).-Аз шумораи умумии иншооти ҷашнии бахшида ба таҷлили 20-умин солгарди истиқлолияти давлатии Ҷумҳурии Тоҷикистон сохташаванда, ки 1412 ададро ташкил медод, 91 адади он ҳанӯз мавриди истифода қарор нагирифтааст, – зикр намуд 16 январ дар нишасти матбуотӣ директори Агентии сохтмон ва меъмории назди Ҳукумати Ҷумҳурии Тоҷикистон Абдувалӣ Комилов. Абдувалӣ Комилов афзуд, ки бинои Китобхонаи миллӣ, ки шомили рӯйхати иншооти ҷашнист, дар арафаи иди Наврӯзи соли 2012 ба истифода дода мешавад. Ба қавли директори Агентӣ беҳтар намудани фазои сармоягузорӣ дар соҳаи сохтмон, рушди боэътимод ва ҷалби бештари сармоягузориҳои мустақим ба ин соҳа аз омилҳои муҳими рушди босуръати иқтисодиёти миллӣ ва рушди соҳибкорӣ дар соҳаи сохтмон мегардад. Зимни нишасти матбуотӣ рӯзноманигорони васоити ахбори омма тавонистанд ба суолҳои худ аз масъулини Агентӣ посухҳои қаноатбахш бигиранд.