Комёбии Юсуф дар Баҳрайн

Душанбе, 27 январ.(АМИТ «Ховар», Марзия Саидова).- Юсуф Тағоев, донишҷӯи соли чоруми Донишкадаи исломии Тоҷикистон /ДИТ/ ба номи Имоми Аъзам -Абӯҳанифа дар озмуни байналмилалии «Ҳифз ва қироати Қуръони карим», ки дар Баҳрайн баргузор шуд, дар риштаи «30 пораи Қуръон» ҷои сеюмро мушарраф гардид. Юсуф донишҷӯи кафедраи улуми қуръонии ДИТ буда, дар озмун дар миёни намояндагони 40 давлати ҷаҳон Тоҷикистонро намояндагӣ кардааст. Умаралӣ Назарзода, ректори ДИТ мегӯяд: боиси ифтихор аст, ки донишҷӯёни донишкада, хусусан муҳассилини кафедраи улуми қуръонӣ дар озмунҳои ҷумҳуриявию байналмилалӣ фаъолона иштирок намуда, ҷойҳои сазоворро мегиранд. Ихтисоси улуми қуръонӣ дар миқёси донишкадаҳои исломии Осиёи Марказӣ танҳо дар ДИТ ба номи Имоми Аъзам — Абӯҳанифа ба роҳ монда шудааст. Алҳол дар ДИТ аз рӯи ин ихтисос беш аз 50 нафар донишҷӯ ба таҳсил фаро гирифта шудааст.