Ксения муаррифгари тамаддуни -форсӣ

Душанбе, 10 январ.(АМИТ «Ховар», Марзия Саидова).- Маҳсули ҳунари дастони яке аз рассомони ҷавони украинӣ Ксения Шевченко, ки дар худ фарҳанги тоҷикию форсӣ, бахусус осори шоирони классикии тоҷику форс –Абдураҳмони Ҷомӣ ва Саъдии Шерозиро таҷассум намудааст, 23 январ дар Қасри фарҳангии шаҳри Донетски Украина ба маърази тамошо гузошта мешавад. Ба намоишгоҳ намояндагони фарҳангу ҳунари шаҳри Донетск ва кормандони Сафорати Ҷумҳурии Тоҷикистон дар Украина даъват шудаанд. Ксения Шевченко 29 сол дошта, зодаи шаҳри Донетск аст. Вай соли 2005 шӯъбаи рассомии омӯзишгоҳи ҳунарии Донетск ва соли 2011 кафедраи графикаи Академияи табъу нашри шаҳри Лвовро хатм намуда, сазовори дипломи магистр ва ихтисоси рассомӣ шудааст. Дар офаридаҳои худ рассоми ҷавон саъй намудааст, ки ду фарҳанг-фарҳанги форсӣ ва славяниро омезиш дода, тахайюлоти олами рангини худро бо мӯқаллам рӯи коғаз таҷассум намояд. Ксения ба фарҳангу тамаддуни тоҷикию форсӣ самимият ва таваҷҷӯҳи хосса дошта, пайваста пайи омӯзиши ҳунару фарҳанги форсӣ, хусусан санъати хушнависӣ, мураттаб сохтани дастхату китобҳо, ки дар худ тасвирҳои қадимиро бо диди муосир омезиш медиҳанд, мебошад. Дар маҳсули ҳунари дастони Ксения нақшу нигори шарқӣ бо ҷилои нав тобиш ёфта, симои қаҳрамонҳои афсонавӣ ва достонҳои безаволи шоирони классики тоҷику форс тасвир гардидаанд.Ксения Шевченко иштирокчии як қатор намоишгоҳҳои шаҳрӣ,минтақавӣ, ҷумҳуриявӣ ва байналмилалии марбут ба ҳунари графика буда, бо диплому ифтихорномаҳо қадрдонӣ гардидааст.