Муҳокимаи қазияи Афғонистон дар Берлин

Душанбе, 18 январ. (АМИТ «Ховар», Пайрав Назаров). – 16 январи соли 2012 мулоқоти сафири Тоҷикистон дар Олмон Эмомиддин Сатторов бо сафири Афғонистон Абдулраҳмон Ашраф ва вакили махсуси ҳукумати Ҷумҳурии Федеролии Олмон оид ба Афғонистону Покистон Михаэл Штайнер баргузор гардид. Дар ин бора аз Раёсати иттилоот, матбуот, таҳлил, ва тарҳрезии сиёсати хориҷии ВКХ ҶТ ба АМИТ «Ховар» хабар доданд.Дар ҷараёни мулоқот лоиҳаҳои барнома ва рӯзномаи конфронси қарибулвуқӯи минтақавии ҳамкории иқтисодӣ оид ба Афғонистон мавриди муҳокима қарор гирифтанд. Конфронс 26 – 27 марти соли 2012 дар шаҳри Душанбе баргузор гардида ва ҳайати Олмон дар кори он ширкат менамояд.Мусоҳибон изҳори итминон намуданд, ки доир намудани ин конфронс дар заминаи конфронсҳои Истамбулу Бонн аз рӯи қазияи Афғонистон боз як раванди муҳими эҳёӣ иҷтимоию иқтисодии Афғонистон гардида ва ба ҳамгироии самарабахши минтақавӣ ва танзими лоиҳаҳое мусоидат менамояд, ки аҳамияти умумиминтақавӣ доранд.Дар шаҳри Берлин ҳамчунин мулоқоти сафири Тоҷикистон бо сафири Дания Пер Поулсен – Ҳансен ва сафири Шведсия Штаффан Карлссон баргузор гардида, дар ҷараёни он масъалаҳои Конфронси панҷуми минтақавии ҳамкории иқтисодӣ оид ба Афғонистон ва иштироки намояндагони олимақоми ин давлатҳо дар он мавриди муҳокима қарор гирифтанд.