Муҳокимаи масъалаҳои истифодаи самарабахши замин

Қӯрғонтеппа, 26 январ. (АМИТ «Ховар», Мурод Сотиев ). – «Бояд ҳангоми истифодаи замин қонуният қатъиян риоя шавад, зеро дар натиҷаи фориғболии баъзе роҳбарон дар амри истифодаи самараноки замин ва риояи қонуният камбудиҳо ба назар мерасанд», — гуфт раиси вилояти Хатлон Ғайбулло Авзалов дар маҷлиси машваратӣ, ки 24 январ дар шаҳри Қӯрғонтеппа баргузор гардид. Дар ҷаласа прокурори генералии ҶТ Шерхон Салимзода, роҳбарони корхонаю ташкилотҳои вилоятӣ, сохторҳои ҳифзи ҳуқуқ, раисони шаҳру ноҳияҳои вилояти Хатлон ширкат доштанд.Прокурори генералии Ҷумҳурии Тоҷикистон Ш.Салимзода зимни суханрониаш зикр намуд, ки дар ҳоли ҳозир мақомоти прокуратура дар амри истифодаи замин бисёр қонуншиканиҳоро ошкор намудааст. Мавсуф рафтори кормандони масъули ноҳияи Вахшро аз ҷумлаи чунин қонуншиканиҳо маънидод кард.