Мулоқоти дипломати тоҷик бо вазири корҳои дохилии Туркия

Душанбе, 7 январ. (АМИТ «Ховар», Бекназари Абӯбакр). — 5 январи соли равон Сафири Фавқулода ва Мухтори Ҷумҳурии Тоҷикистон дар Ҷумҳурии Туркия Фаррух Шарипов бо вазири корҳои дохилии Ҷумҳурии Туркия, раиси Комиссияи муштараки байниҳукуматии иқтисодии Тоҷикистон-Туркия Идрис Наим Шаҳин мулоқот намуд.Зимни мулоқот рафти иҷрои муқаррароти Протоколи ҷаласаҳои Комиссияи муштараки иқтисодии байниҳукуматӣ, мавзӯъҳои ҷоннок намудани кори Комиссияи мазкур, масоили ҳамкориҳои иқтисодӣ-тиҷоратӣ, илмӣ-техникӣ ва истеҳсолӣ, ташкили корхонаҳои муштарак дар соҳаҳои саноати сабук ва хӯрокворӣ, истихроҷи маъданҳои кӯҳӣ ва кимиёвӣ, коркарди маҳсулоти кишоварзӣ, рушди соҳаи сайёҳӣ, омодасозии мутахассисони гуногунихтисос ва иштироки соҳибкорони бонуфузи Туркия дар лоиҳаҳои сармоягузории Тоҷикистон баррасӣ гардиданд.Дар рафти сӯҳбат Идрис Наим Шаҳин аз сатҳи муносибатҳои дуҷониба изҳори қаноатмандӣ намуд. Ӯ ба лоиҳаҳои сармоягузорӣ таваҷҷӯҳи хоса зоҳир карда, ҷиҳати рушди ҳамкориҳои мутақобилан судманд дар тамоми соҳаҳо ва фаъолгардонии кори Комиссияи байниҳукуматии иқтисодӣ омодагии ҷониби Туркияро изҳор намуд.Қобили зикр аст, ки Комиссияи байниҳукуматии иқтисодии Тоҷикистон-Туркия аз соли 2000 фаъолият намуда, то ин ҷониб 7 ҷаласаи он дар шаҳрҳои Душанбе ва Анкара баргузор гардидааст.Аз Вазорати корҳои хориҷӣ ба АМИТ «Ховар» хабар доданд, ки охирон ҷаласаи Комиссияи мазкур соли 2009 дар шаҳри Душанбе сурат гирифтааст. Соли ҷорӣ дар Туркия баргузории ҷаласаи навбатии Комиссия дар назар аст.