Мулоқоти роҳбарони хадамоти муҳоҷират

Душанбе, 26 январ. (АМИТ «Ховар», Лутфия Эшонқулова). – 25 январ сардори Хадамоти муҳоҷирати назди Ҳукумати ҶТ Сафиалло Девонаев бо раиси ҳайати мушовараи вакилони ҳимояи мустақил дар шаҳри Душанбе Фахриддин Зокиров мулоқот намуд. Тавре аз маркази матбуоти Хадамоти муҷирати назди Ҳукумати ҶТ хабар доданд, дар ҷараёни мулоқот масъалаи таъсиси гурӯҳи вакилони ҳимоя дар Федератсияи Русия ба манзури расонидани кӯмаки ҳуқуқӣ ба муҳоҷирони меҳнатии Тоҷикистон мавриди муҳокима қарор гирифт. Ҷонибҳо аҳд карданд, ки вақтҳои наздиктарин гурӯҳи вакилони ҳимояи назди Намояндагии Хадамоти муҳоҷират дар Федератсияи Русия баъди сабти расмӣ корашро дар шаҳри Маскав оғоз мекунад.Хадамоти муҳоҷират ният дорад, ки дар оянда якҷоя бо ҳайати мушовараи вакилони ҳимояи мустақил дар шаҳри Душанбе барои расонидани кӯмаки ҳуқуқӣ дар ҳамаи ниҳодҳои округҳои Федералии Русия идораҳои худро кушояд.