Мулоқоти Сафири Тоҷикистон бо Муҳаммад Аслам Хон

Душанбе, 9 январ. (АМИТ «Ховар», Пайрав Назаров).-Сафири Фавқулодда ва Мухтори Ҷумҳурии Тоҷикистон дар Ҷумҳурии Исломии Покистон Зубайдулло Зубайдов 6 январ бо директори Департаменти кишварҳои узви Созмони Ҳамкориҳои Иқтисодӣ( СҲИ) ва Осиёи Марказии Вазорати корҳои хориҷии Покистон Муҳаммад Асламхон мулоқот доир намуд. Омодагӣ ба Конфронси ҳамкориҳои минтақавии иқтисодӣ оид ба Афғонистон (RECCA-V), ки 26 – 27 марти соли 2012 дар Душанбе баргузор хоҳад шуд, мавзӯи меҳварии мулоқоти ҷонибҳо қарор гирифт. Сафир З. Зубайдов қайд намуд, ки конфронси мазкур дар сатҳи баланд бо иштироки вазирони корҳои хориҷӣ баргузор гардида, барои ба эътидол овардани вазъияти Афғонистон, аз ҷумла барқарорсозии иқтисодиёти он мусоидат хоҳад кард. Дипломати тоҷик ҳамчунин таъкид сохт, ки иштироки Вазири корҳои хориҷӣ ва ҳайати босалоҳияти Покистон дар ин чорабинӣ зарур мебошад. Дар навбати худ Муҳаммад Асламхон ин пешниҳодро хуб пазируфта, баргузор гардидани конфронси мазкурро муҳим арзёбӣ намуд. Ӯ иброз дошт, ки Покистон ба ҳалли мусбати қазияи Афғонистон ва барқарорсозии сулҳу субот дар ин кишвар манфиатдор мебошад. Аз ин рӯ, ба гуфти дипломати покистонӣ, Покистон доир гардидани Конфронси RECCA-V-ро дар Душанбе ҳамаҷониба дастгирӣ мекунад ва ҳайати баландпояи кишвар дар он иштирок хоҳад намуд. Директори Департамент илова кард, ки бояд ҳамаи кишварҳои минтақа ва пеш аз ҳама Тоҷикистону Покистон дар ҳалли мушкилоти Афғонистон фаъолона иштирок дошта бошанд.