Мусофирон нороҳат набошед!

Душанбе, 5 январ.(АМИТ «Ховар», Марзия Саидова).-Бо сабаби аз ҷониби Ӯзбекистон қатъ гардидани интиқоли гази табиӣ ба ҷануби Тоҷикистон ва муваққатан аз фаъолият мондани нуқтаҳои гази табиӣ, ҳаракати воситаҳои нақлиёт дар хатсайри микроавтобуси №22, автобусҳои хатсайри №1, №2, №12 ва №37, ки дар ҳудуди шаҳри Душанбе ба мусофиркашонӣ машғуланд, барои мусофирон шояд нороҳатӣ оваранд. Дар ин хусус ба АМИТ «Ховар» Шавкат Саидов, котиби матбуотии раиси шаҳри Душанбе иттилоъ дод. Бо назардошти ҳолати ҷойдошта шаҳрдорӣ ва сохторҳои марбутаи нақлиётӣ кӯшиш ба харҷ медиҳанд, ки аз ҳисоби воситаҳои нақлиёти бо дигар намуди сӯзишворӣ фаъолияткунанда норасогии ба амал меомадаро бартараф созанд. Зимнан, аз сокинон ва меҳмонони пойтахт хоҳиш карда мешавад, ки нисбат ба нороҳатии муваққатӣ бо ҳусни тафоҳум муносибат намоянд.