Нафақагирони шаҳри Ваҳдат ба кортҳои бонкӣ гузаштанд

Душанбе, 30 январ. (АМИТ «Ховар», Покиза Маҳмадбекова). — Дар филиали БДА «Амонатбонк» дар шаҳри Ваҳдат маросими расмии гузариш ба хизматрасонии кортии нафақагирон доир гардид. Шумораи нафақагирон дар шаҳри Ваҳдат беш аз 18 ҳазор нафарро ташкил медиҳад. Ба мухбири АМИТ «Ховар» аз Хадамоти матбуот ва рекламаи БДА «Амонатбонк» иттилоъ доданд, ки дар доираи татбиқи чорабинии мазкур дар бинои филиали номбурда як адад дастгоҳи банкомат насб гардида, тамоми нуқтаҳои пардохти нафақа бо пос-терминалҳо таъмин карда шуданд. Дар баробари иҷрои корҳои техникию ҳуҷҷатгузорӣ масъулин диққати ҷиддиро ба корҳои иттилоотонию фаҳмондадиҳӣ равона намуда, аз ҳисоби кормандон гурӯҳҳои фоҳмондадиҳӣ ташкил кардаанд. Гурӯҳҳо ба нафақагирон тарзу усули кор ва қоидаҳои истифодаи кортҳоро фаҳмонида, дар марҳилаи аввал ба онҳо кӯмаки амалӣ мерасонанд. Яке аз барномаҳои мавриди таваҷҷӯҳ, ки солҳои охир аз тарафи «Амонатбонк» дар ҳамкорӣ бо Вазорати меҳнат ва ҳифзи иҷтимоии аҳолии ҶТ амалӣ мешавад, ин Барномаи гузариши пардохти нафақа тавассути кортҳои бонкӣ мебошад. Бояд гуфт, ки барномаи мазкур сар аз соли 2009 дар саросари кишвар роҳандозӣ шуда, имрӯзҳо даври сеюми он дар арафаи анҷомёбист.