Омодагӣ ба Наврӯз дар зимистон

Душанбе, 18 январ.(АМИТ «Ховар», Марзия Саидова).-Барои дар сатҳи баланд ва пуршукӯҳ истиқбол гирифтани ҷашни байналмилалии Наврӯз дар пойтахти ҷумҳурӣ аз 21 январи соли 2012 ҳар ҳафта шанбегӣ гузаронида мешавад. Дар доираи баргузории шанбегиҳо он биноҳое, ки дар шафати биноҳои баландошёна ба таври ғайриқонунӣ сохта шудаанд, ба дигар маҳаллаҳо кӯчонида шуда, қитъаҳои замине, ки аз ҷониби сокинон худсарона азхуд карда шудаанд, ба тавозуни шаҳр дароварда мешаванд. Назар ба иттилои Шавкат Саидов, котиби матбуотии Раиси шаҳри Душанбе дар шанбегиҳо тамоми кормандони идораю корхонаҳо ва сокинони пойтахт иштирок намуда, дар тозагию ободонӣ ва ниҳолшинонию кабудизоркунии маҳали зист ва кӯчаю хиёбонҳо саҳм мегузоранд. Бояд тазаккур дод, ки соли равон ҷашни байналмилалии Наврӯз дар пойтахти Тоҷикистон –шаҳри Душанбе бо иштироки Сарони кишварҳои форсизабон ва дигар давлатҳое, ки Наврӯзро таҷлил менамоянд, истиқбол мешавад.