Самти асосӣ — таъмини иҷрои вазифаҳои стратегӣ

Хоруғ, 27 январ. (АМИТ «Ховар», Л.Додо ). – Раиси ВМКБ Қодири Қосим дар нишасти матбуотӣ перомуни натиҷаҳои рушди иҷтимоию иқтисодии вилоят дар соли 2011 сухан кард. Ба гуфти ӯ, буҷаи вилоят аз рӯи даромади худӣ 119,8 фоиз иҷро гардида, 2357 нафар соҳибкорони инфиродӣ ба андозбандӣ ҷалб карда шуданд, ки нисбат ба соли 2010 – ум 636 нафар зиёд аст. Бонкҳои вилоят баробари 77 миллион сомонӣ маблағгузории қарзиро анҷом дода, аз ҷониби муҳоҷирони меҳнатӣ 44,5 миллион доллари ИМА интиқол дода шуд. Пасандози мардум дар Бонкҳо 62 миллион сомониро ташкил медиҳад, ки ин нисбат ба соли 2010 – ум 60 фоиз зиёд аст. Дар вилоят 8739 ҷойи нави корӣ таъсис ёфта, ба маблағи беш аз 47 миллион сомонӣ маҳсулоти саноатӣ истеҳсол шудааст. Раиси вилоят ҳамчунин перомуни дастоварду нуқсонҳои соҳаҳои иқтисодию иҷтимоӣ, тандурустӣ, кишоварзӣ ва ғайра муфассал сухан ронда, вазифаҳои минбаъдаи стратегиро муайян кард.