Санҷишҳои комплексӣ бештар шуд

Душанбе, 16 январ. (АМИТ «Ховар», Лаззат Диловарзод).- Кумитаи ҳифзи муҳити зист соли 2011 21 ҳазору 682 санҷиши комплексӣ — соҳавӣ ва фаврӣ гузаронид, ки нисбат ба соли 2010 4 ҳазору 898 адад ё 25 фоиз зиёд мебошад. Санҷиш муайян намуд, ки садҳо субъекти хоҷагидор ба масоили экологӣ аҳамият надода, ба қонуншиканиҳои зиёд роҳ додаанд. Кормандони Кумитаи мазкур дар маҷмӯъ барои риоя накардани талаботи қонунгузорӣ дар соҳаи экология 31 ҳазору 203 пешниҳоди иҷрояшон ҳатмӣ додаанд, ки 70 фоизи онҳо иҷро гардид,- иброз дошт раиси Кумита Талбак Салимов зимни нгишасти матбуотӣ, ки имрӯз дар маҷлисгоҳи кумитаи мазкур баргузор гардид.Ба гуфти раиси кумита, барои риоя накардани қонунгузориҳои ҶТ дар соҳаи ҳифзи муҳити зист, стандарт ва меъёрҳои экологӣ 1575 парвандаи дар мавриди қонуншиканию ҷиноятҳо ба мақомоти ҳифзи ҳуқуқ ирсол шудааст, ки нисбат ба соли 2010 ба андозаи 22,4 фоиз зиёд аст. Барои қонунвайронкунӣ 18 ҳазору 553 нафар шахсони воқеӣ ва ҳуқуқӣ ҷарима шудаанд. Дар 1228 ҳолат зарари ба экология расонидашуда барқарор карда шуд, ки он аз пешравии кор дар ин соҳа далолат мекунад,- афзуд раиси кумита.