Шаҳр обод шуд, аммо…

Хоруғ, 25 январ. (АМИТ «Ховар», Л.Додо ). – Дар машварати васеи назди раиси шаҳри Хоруғ натиҷаи рушди иқтисодию иҷтимоии маркази вилоят дар соли 2011 мавриди баррасӣ қарор гирифт. Муовини аввали раиси шаҳр Соҳибназар Холиқназаров зикр намуд, ки гарчи баъд аз истиқлолияти кишвар шаҳри Хоруғ симои худро ба дараҷаи шинохтанашаванда тағйир дода бошад ҳам, вале камбудиҳо дар самти фаъолият надоштани соҳаи сайёҳӣ ва ҳифзи муҳити зист, ба талаботи имрӯза ҷавобгӯ набудани ҳолати эпидемиологию санитарии шаҳр ва ғайра ҳанӯз ҳам зиёданд.Ба хотири беҳбудии рӯзгори сокинони шаҳри Хоруғ дар маҳаллаи Тем барои бунёди хонаҳои истиқоматӣ 65 гектар замин ҷудо гардида, аллакай 117 нафар эҳтиёҷмандон барои бунёди манзил ҷой гирифтаанд. Рӯзҳои наздик ҳамаи аризаву ҳуҷҷатҳои шаҳрвандони дигаре, ки дарвоқеъ ба ҷойи зист ниёз доранд, аз ҷониби комиссияи махсус санҷида мешавад.