Табобати тарбиятгирандагони Ҳисор дар Суғд

Суғд, 31 январ. (АМИТ «Ховар», Мирзалӣ Амонов).-Дар мактаб-интернати низомаш махсуси ноҳияи Ҳисор 330 нафар тарбиятгиранда, ки ҷисман маъюб буда, гирифтори бемории фалаҷи майнаи саранд, тарбият меёбанд. 50 нафар тарбиятгирандаи мактаб-интернати ноҳияи Ҳисор дар моҳи январ дар беморхонаи физиотерапевтии ҷумҳуриявӣ, воқеъ дар шаҳри Хуҷанд ба табобати марҳилаи навбатӣ фаро гирифта шуданд. Беморхонаи физиотерапевтии ҷумҳуриявӣ бо дастгирии Вазорати тандурустӣ ва мақомоти иҷроияи ҳокимияти давлатии вилояти Суғд табобат, таъмини дору, маводи тиббӣ ва ғизоии кӯдакон-тарбиятгирандагонро таъмин намуд.Дар давоми се соли охир аз 330 нафар тарбиятгирандаи мактаб-интернати низомаш махсуси шахри Ҳисор қариб 200 нафарашон дар ин ҷо табобат гирифта, ҳаракати узвҳои бадан ва нутқашон фаъол гардид, дар фикрронӣ ва роҳгардии ҳар яки онҳо пешравӣ ба назар мерасад. Дар беморхонаи физиотерапевтии ҷумҳуриявӣ дар баробари табобат меҳру муҳаббати табибон худ муолиҷаи дигар аст.